Mos. 24 de xaneiro. Os veciños de Mos poderán adquirir competencias dixitais transversais grazas a unha nova iniciativa formativa que comezará no Centro de Capacitación. Este programa pretende reducir a fenda dixital e facilitar o acceso a ferramentas tecnolóxicas clave tanto para persoas en situación de desemprego como para traballadores en activo. Ademais, busca adaptar a formación ás necesidades laborais actuais e ás esixencias dun mercado en constante transformación.
Os cursos inclúan unha “primeira alfabetización dixital” e avanzan cara a formacións máis especializadas en áreas como programación, robótica ou metodoloxías áxiles. Cada formación ten unha duración total de 30 horas, estruturadas en unidades de 7,5 horas, cun enfoque eminentemente práctico que segue os contidos do Catálogo Nacional de Cualificacións Profesionais (SNCFP). Isto permitirá ao alumnado obter acreditacións oficiais que melloren a súa inserción laboral.
Entre os módulos que se impartirán destacan:
- Tecnoloxías habilitadoras dixitais: Intelixencia Artificial, Big Data, 5G, Blockchain, ciberseguridade, entre outros.
- Información e alfabetización dixital: Uso de correo electrónico, Google Calendar, buscadores e introdución á Big Data e Intelixencia Artificial.
- Comunicación e colaboración: Redes sociais, blogs e ferramentas colaborativas como Teams ou Slack.
- Creación de contidos dixitais: Office 365, realidade aumentada, impresión 3D e pensamento computacional.
- Seguridade na rede: Cómo protexer dispositivos, ciberseguridade e xestión da identidade dixital.
- Resolución de problemas: Aplicacións para traballo en remoto, introdución a metodoloxías áxiles como SCRUM e xestión en entornos VUCA.
A programación mensual e os horarios flexibles, con quendas de mañá e tarde, buscan adaptarse ás necesidades persoais, laborais e sociais do alumnado. As persoas interesadas poden inscribirse a través do correo electrónico empleo@concellomos.es ou chamando ao 986 487 786. As prazas son limitadas, polo que é recomendable formalizar a inscrición canto antes.
Esta iniciativa refórzase cos programas xa existentes no Centro de Capacitación en marketing e carpintería, consolidándose como un referente para a capacitación tecnolóxica e o desenvolvemento profesional.
O proxecto conta co apoio do Concello de Mos, que promove esta acción para fomentar a empregabilidade e a actualización dixital da poboación.
